بحر الكبدة الإسكندراني

أنا قلبي كان ملوخية أصبح جزر
هرشتلو..وقع من ودني و اتفرس
قلتلو ليه بوظت الطبيخ
دي حتى التقلية.. أهم حاجة فيها النفس

آه يا كت كات .. ياللي بتيجي بالجوز
فين أيام عين الست و الملبن و اللوز
فين أيام عم أحمد و بم بم بتاع الجوايز
إعلانات شغالة عالفاضي و محدش فايز

يا أم الشوق يا بتاعت الفول و الطعمية
لا الحكومة سايباكي ولا البلدية
ولا الماك فلافل بتاع الشركة الأمريكانية
ولا هم العيال و الدنيا المفترية

أه يا كاوتش اتهرى من كتر اللف على الطريق
آه يا غلابة يا شقيانين ياللي حتموتكو دنيتكو من غير رفيق
آه يا موظفين على الناصية مترصصين مستنيين
آه من غلبكم ولا من اللي غلبكم يا مصريين

يا بتاع الكبدة يا وسخ يا معفن
ولاد الزوات على كبدتك بتجنن
يا سلام لو يعرفو كبدتك جت منين يا صايع
من شركات أهاليهم و اللعب في الوقت الضايع