أكلة مصرية

يا ريت كل حاجة حلوة زي الملوخية
مع حبت صلصة و بصلة و رز و يبقى كله مية مية
و كل اللي طالع و نازل عالسلالم يتجنجنن عالتقلية

و حتتين بتلو سايحين و متسبكين و متودبين و في وسط الصلصة قاعدين
مستنيين يتشالوا و يتحطوا على الرز بالملوخية

يا حلاوتك يا ست يا رايقة يا قعدة تخرطي في الملوخية
تتفرجي على المسلسل و اللى حصل في سعاد و حسنية
و البت أوشين بتاعت البلاد الأسيوية

يا ريت كل حاجة حلوة زي الملوخية

يا حلاوة البصل المترصص و المتجعلص و عليه ورقة مكتوب عليها مية
تحته الشبت و الجرجير و البصل الأخضر الخطير اللي بيتمزمز مع الملوخية
و القوطة قاعدة في النص مستوية و متهنية

يا حلاوة الطشة و الرشة و الريحة و نفس الولية
يا حلاوة العيش البلدي و السمن البلدي و الشيش اللى مدخل نسمة صيف معدية
يا حلاوة الحلة و القلة و المفرش اللي مليان ورد و فل و يا حلاوتك يا سلطانية

لازم تتش الطشة و تلسوع الحلوين عشان تكمل الطبخة
دي حاجة مايفهمهاش الرجالة بس الولية
اللي بيقعدوا عالسلم يحكوا على رجالتهم الأونتجية

و أدي البصل بقى خمسماية بدل مية
و آدي القوطة بقت ناشفة و قوية
و آدي البتلو أختفى من عالصينية

و تقولي مية مية؟
أنتو فكرينها إيه ؟ تكية؟!!! دي ملوخية يا بشر! ملوخية!!!!!!!!!